等埋皇叔

過咗一個禮拜喇，睇過吓嗰台兒戲嘅一啲片段，到家陣都仲係有啲心噏，嚡！

話想「等埋皇叔」喎。嚡！噉嘅一場兒戲，都喺議會演得出嚟，真係聞者皺眉，見者激心！噉就當然梗係除咗嗰班仇共入骨，如癡如醉嘅政棍，同埋據統計推算有若干百萬、樂於攬埋一舊玉石俱焚嘅癲喪支持者啦。我諗佢地否決得逞，都仲有排亢奮，一心以為鴻鵠將至，成功搞到北京一棟都冇！

嚡，就算等埋皇叔，唔咪就係多嗰一票囉，又有乜嘢作用至得賈！人地只須掟24張反對票就否決你喇，而家28人齊輯輯躉晒喺度！唔通到咗噉嘅田地，晏晝洞洞仲發其春秋大夢，異想天開咩！莫非以為有個齊天大聖飛天遁地到嚟襄助，去敵對陣營變出五個披髮仇共政痞，等皇叔嚟到，每個夾硬塞兩億元畀佢，收買佢轉軚投贊成票？噉嘅無聊舉措，真係莫名其妙！

居然因為等埋一個皇叔，搞出一幕30幾人投得嗰8票嘅荒誕劇，此後年年月月，直到永遠，畀班自以為大義仇共嘅癡狂者見一勻笑一勻，指口篤鼻窒一餐，你都米話唔難出嚟見人呀！

哩次歷史性首演搞到噤肉酸收場，似係有人過度落力表現自我，亂揸雞毛令箭所致。哩幾個愛港者係咪太自信咗啲呢？對自己嘅號召力同領導權威何以錯誤估量至此！？

不過廢話講番轉頭，我就認為之噉呀，今次冇錯係，8票哩個實數無疑少得好淒涼，千秋萬代記錄在案確係都幾核突吓，但係其實又都冇乜大不了啫。反而如果一個噤冇共識嘅方案居然意外勉強通過咗，噉反而係大凶之兆呀，香港勢必全城大亂，有啲同當年阿Q噤上下見識嘅狂躁者會極度悲憤，誤判形勢，認為時機已到，會即刻揭竿起義都有份。

退一萬步諗吓，家陣就算五百萬人投票選出咗個行政長官，佢必然同時會有數以百萬計嘅廢票、白票「袋到永遠」，就算競選成功，面上都好難有乜光彩，管治起上嚟唔見得會有效得過而家吓！

自從國家收回主權，香港哩條從來指向英美嘅藍色龍尾巴，擺動起嚟註定係要盲目亂掹亂扯成條巨龍，並且越嚟越病態亢進，搞到北京個赤色龍頭，要晚晚瞓捩頸，simply it’s an atypical case of a very tiny little tail wagging the colossal dragon head！

竊以為，哩趟嗰班所謂愛國愛港嘅「建制派」陣前甩械，其實可以話係錯有錯著，唔覺意夾埋嗰幫無法與共產黨共存嘅所謂「泛民」，做咗一件表面睇嚟好似進一步損害北京嘅形象，但實質反為有可能對國家發展有長遠益處嘅好事！

歸納益處有三：
其一，政改方案否決咗，重啟程序絕對有理由可以遙遙無期。京官理所當然暫時鬆咗一口大氣，餘力可以用嚟深入檢討，重新部署，應對香港管治失效所帶嚟往後長期每日出現嘅頭痛問題。並且更加如臨深淵，如履薄冰，避免指日亡黨亡國，衰畀哩幫如癡如醉嘅香港死硬仇共派睇。

其二，8比28喎，真係幾丟架！唔多唔少應該會有刺激北京痛定思痛嘅作用，等班京官徹底反思之後，認識到香港嘅唯一出路，唔係枉費心機喺香港刻意扶植自己人或同路人，而係要加速國內政治同社會改革，從嚴治黨，從寬治國，盡量改善共產黨政權積存幾廿年嘅國際負面形象，爭取喺未來十年內，令到多啲反共、仇共、蔑共、恐共嘅所謂港人，同埋嗰啲以消滅共產黨為神聖使命嘅外部勢力人士，願意緩解一下佢地盲目、極端、病狂嘅敵對情緒。

其三，給予哩一大班愛國愛港、甚至愛黨嘅港人充分時間，去好好積極學習，日日勤加鍛鍊，提升個人整體素質及從政能力，以冀早日趨近世界先進水平，庶幾將來其材可堪大用，有料足以治港。

噉樣一來，年年殷勤為香港虔誠拜禱，感天動地，因而趟趟幸免摮出下籤嘅皇叔，雖然嗰日投票行差一步，間接製造咗一出貽笑大方嘅政圈荒誕劇，未始唔係錯有錯著，對祖國同香港嘅前途，反為會有些少益處都未定。

於此僅向皇叔預先講聲唔該晒！