今時唔同往日，「八號風球」九成唔會死人。哩趟敝客居然仲喺山林裏頭、做番一次包冇死得嘅見證添。
星期日一大早，「天文台」已經從夜晚掛起嘅「一號風球」轉咗「三號」，仲話好快要再改掛「八號風球」添，並且會轉吹南風！噉敝客所在山區豈非畀佢打到正晒！
敝客於是就狼狽囉！為免死在山林要勞煩有關人員長途跋涉嚟善後，唔洗徵詢顧問，都識得係要即刻煮飯食飽，連隨出山趯路啦！
敝客同一般露營者唔同，由於裝備物項多，加上收拾程序複雜，撤營執嘢最少要兩個鐘頭。而哩次仲唔止添喎，可謂禍不單行，因為用咗八年嘅背囊、嗰兩條外架主骨唔生性，喺來程初段受夠咗長期勞役，攔腰斷咗！家吓首先要幫佢求其駁番兩條骨，至可以執嘢裝入去。
於是匆匆冒雨上坡，斬咗兩枝都算幾直嘅山棯樹榦，再用幾條來程遇倒嘅警察畀嘅、估計係用嚟拘捕非法入境者嘅尼龍索帶，求其將背囊嘅兩條外架主骨臨時修復。
哩個時候風雨大咗些少，張3米乘5米嘅頂篷要即刻裁去一節篷竿，以避免雨水撇得帳篷太濕。噉就慘喇，即係跟住嘅兩個鐘頭，一切行動都要彎腰而為，冇得頂天立地。琴日背囊斷骨，重力方向改變，腰下過度受壓，行咗兩個幾鐘頭，盆骨部位已經有啲痠痛，家吓仲要攣住條腰螁嚟螁去卸帳、執嘢，都米話唔辛苦！不過哩啲叫做自己攞苦嚟辛，敝客冇得怨天尤人！
折腰埋頭苦幹兩個鐘頭之後，終於搞掂晒。嚴重傷殘嘅背囊於是上膊，估計仲重過來時好幾公斤，因為一切都係濕嘅，尤其是嗰張頂篷，直情濕到摺都摺唔埋噤滯！
拔營起行喇。個心諗：睇下兩個幾鐘頭之後、趕到出去北潭坳、仲有冇巴士搭啦！如果巴士已經停開，吹風淋雨徒步行出西貢市區都要咖喇，鬼叫我揀正哩兩日嚟入山咩！時值大暑，偏偏琴晚都唔知幾涼幾好瞓，算係有過一夜風流喇，呵呵呵！
大概就喺哩個時候，當時我仲未知嘅，原之來個壞鬼颱風洛克已經登緊陸，嗰個噉嘅「天文台」已經打算好快改掛「三號風球」。而敝客當時所在，正係個颱風登陸位置嘅範圍之內！噉就真係出奇喇，啲風冇錯係好似轉咗方向，一陣陣迎面吹嚟，但係唔覺得大咗好多喎！
正所謂一百歲唔死都有新聞聽！噉樣掛「八號風球」法，幾廿年來我真係都未見過！喺野外遭逢八號風球，今次好似係第二次；喺營地呢，直頭就係破題兒第一遭！
沒有留言:
發佈留言