粵文七律—清明節近有感並序

序

嗰頭啱啱過佐年，一斬眼到清明邊。 唐詩有云，「清明時節雨紛紛」。 落雨，係春季常規氣象。 但係根據「香港天文台」嘅「天氣預測」，今歲節期當日，展望樂觀，大概冇乜機會落雨。 郊遊拜山，適值良辰。

既近掃墓時節，自然諗起墳場。 香港地小人稠，墳場處處，雖無國家公墓或者革命陵園之類嘅勝景，但有別具風格，環境幽雅嘅細塊墓地，散處香港各區。其中赤柱軍人墳場早成遊覽景點，頗受歡迎，大概因為位於市郊，交通方便，環境幽美恬靜。 呢片墳場終年吸引不少遊人，尤其係情侶。沙灘漫步之後，燭光晚餐之前，偶爾流連此中，倚碑依偎，除鞋踏青，你都咪話唔浪漫！

位於跑馬地，亦即係「快活谷」，毗鄰鬧市嘅天主教聖彌額爾墳場，亦都堪稱遠近聞名。佢之所以出名，除佐有幾位名人安息其中，同埋場內藝術氣氛濃厚，宗教雕像林立，仲有就係墳場入口嗰對門聯，乍睇一讀，足以令人赫然醒覺：「今夕吾軀歸故土，他朝君體也相同。」

愚意認為，此聯實未盡善，略有催人入園，早投主懷嘅意味。 若從對聯結構嘅角度嚟睇，兩句末尾亦對得唔多工整。上句「歸故土」，下句「也相同」，明顯唔係幾對得埋欄喎。另外，「故土」一詞，並非直解「泥土」，而係「故鄉」嘅意思。此義自唐以來未有改變。 我估，埋葬喺裏便嘅全部墓主人，怕者都冇乜邊個嘅「故土」，會係香港快活谷；亦大概唔會只係暫埋本地，等住他日歸葬故鄉。 另外，靈柩入土，多數選擇日光日白嘅吉時，絕少會喺夜晚，「今夕」一詞，似乎唔夠貼切嘞。 如果我係當年題寫門聯嗰位神父，或者我會噉寫法：

「今日吾軀歸土穴，他朝君魄住天堂。」

噉樣一嚟，除佐提醒生命無常，亦附帶幾分略有靈性嘅鼓勵。贈人以良好祝願，誰曰不宜？ 當然，必須強調，噉講只不過係鼓勵，最終上唔上得到天堂，人人都知道，要自己先做好，再等天主嚟話事。

嗐呀，扯到去邊度？要返入正題至得啦！ 講番香港最大嘅墳場：和合石。 和合石其實唔係一個單一嘅墳場，而係包括好幾個墳區或者獨立墓園嘅墳山，其中「浩園」安葬殉職公務員，「景仰園」安葬因見義勇為而犧牲嘅市民。 浩園環境幽美，有保安員巡察，園名取「浩氣長存」之意，但係比起有孫中山先生「浩氣長存」親筆題匾，名列「全國第一批重點文物保護單位」嘅廣州黃花崗七十二烈士墓園，就清靜好多咯。

舊年我去黃花崗，購票入園，竟然聽到林木之中，傳嚟陣陣粵劇練腔之聲，此起彼落，不絕於耳；碑亭之下，更有老漢赤腳歪坐，放聲爭論，興致方酣，旁若無人。

當然，和合石嘅浩園能保清靜，只在平日，一旦到佐清明前後、重九左近，怕者真係唔只喧嘩雜遝咁簡單，仲會搞到隨地垃圾，污糟邋遢添。 拜祭先人之後，盡興墳山短逗留，喺涼亭之下，赤膊斬燒豬，咿牙嚓雞髀，開襟飲汽水，棟腳嘆涼啤，自然就唔在話下咯。不過個亭真係好細咖咋，先到者先得，遲嚟要排隊。

個浩園尚且如此，山上其餘墳區，就更係一句講完：不堪入目！ 所有墓地，似乎一向冇人清理。 好多孝子賢孫，對於保持墓地清潔，毫無意識。 任何廢物，隨手拋棄。膠樽膠袋、發泡膠盒、紙碟紙杯、即棄筷子、紙巾，仲有元寶蠟燭、衣紙冥鈔嘅火後殘留碎屑，真係琳瑯滿目乜都有！ 呢啲廢物年年累積，歲歲增加，冇人見到會作嘔，政府無須去清理，聽任徑旁草中，自然分解，五十年如一日！


清明祭祖拜山時，是否真誠邊個知！
往日捱窮爭的士，今朝暴發坐奔馳！
燒豬美點墳前嚓，膠袋空樽墓側遺。
垃圾琳瑯唔覺眼，無心放火未為衰。