漫談爛口

日前本地有個小學女教師，據講由於警察偏袒嗰個乜野「青年關愛協會」，任由佢地騷擾畀內地定性為邪教嘅「法輪大法」「街站」，呢位女士不值警察所為，一時義憤填膺，忍無可忍，於是挺身而出，為「法輪大法」抱打不平。

該師怒呼警官為「公安」，並用「八公」、「八婆」、「賤人」等字眼辱罵該等警務人員，終至亢奮過度，忍唔住口，最後鬧出一句片語，內含嗰個關鍵 four-letter-word, 雖然博得網下網上多番喝采，但又受到唔少批評，終至因為噏佐嗰個字眼，要向學校、同事、家長同埋學生道歉。

在此無意對成件事嘅是非黑白予以探討，因為當今世情烏煙瘴氣，自問真係冇乜足夠嘅分辨能力。家吓淨係想從嗰個英語 four-letter-word 講起，借題發揮，研究一下講爛口嘅心理因素唧。

今日英語嘅呢個所謂 four-letter-word, 實際上唔係好似粵語嘅相應字詞噉(借字，在此讀作敢，唔讀啖)，含有噤重嘅「性攻擊意味」，甚至有時用得比較中性，只係意指一般兩情相悅或者錢肉交易嘅「做愛」，此中甚至並冇男女、女男、男男或者女女，同埋主從之分，又唔多附帶明顯嘅侵犯或者強暴嘅色彩。

其字原本雖然仲有其他不關乎「性」嘅含義同用法，但時至今日，已經大致因為迴避而消失殆盡，剩低嘅意思就淨係指性交而已。此字雖然並非好「爛」，畢竟入於粗俗，用之則不雅，因而視為一般禁忌語，可以話喺任何場合都唔適宜講。就算正正經經噉講到性事，都唔可以用呢個字眼。

我估該師多數係受家庭、朋儕嘅文化薰陶，耳濡目染，一旦火滾起黎，「八公」、「八婆」、「賤人」用晒都嫌未夠喉，於是呢個 f-word 就衝口而出。

好奇上網睇吓有關嘅「要吐不」短片，赫然發覺該師原來仲上佐一個網絡電台節目作客。錄播廳背景有「蘭花系」三字。奇怪何以蘭花不稱科、稱屬、稱種，而稱系？仲以為係啲乜野「雅集」之類添，點知睇吓睇吓就噏句爛口，再睇落去又黎多句。

後來點擊多兩下，睇多兩個網頁，先至知道原來該台係由一個叫做「調X農務蘭花系」嘅社團經營，團名似通非通，原來只係為佐夾硬諧音，要虛飾嗰一句粵語祖傳終極爛口，意思好簡單，就係話「其陽具要插入對方老母親嗰個溶溶爛爛嘅陰戶度」！估計如果直接用爛口原句為名，可能無法註冊，開唔倒銀行帳戶，所以唯有改用諧音字。

嗰位身為羅馬天主教會小學教師嘅女士，在此「艱巨勞務」氛圍之中，竟爾能夠泰然自若，認真對答，你都米話唔耐人尋味，令人百思不得其解！

可以理解，統治集團同社會精英集團將經濟領域、道德高地同權力機構一概佔領，集於一體，低下階層老百姓受到壓迫，連誒都冇得誒一聲。一旦怨憤既深，冇碇宣洩，忍無可忍，就會迸發怒吼。對於一啲冇受過幾多教育，唔鍾意講禮貌道德，唔識乜野叫做斯文優雅嘅老粗，隨口一噏，似乎都係只有嗰句終極爛口最痛快咯，咪就係：「艱巨勞務」！

可以想象，姦，對於某啲男人而言，強又好，唔強又好，都可以獲得性快感、性滿足，總之可以令女方痛苦呻吟，然後懷胎，跟住同佢生個「野仔」。幾多禽獸喺發情期打到頭崩額裂，遍體鱗傷，唔係都係為佐搶佔交配權咩？有乜野仲緊要得過呢項天經地義嘅獸行嗟？

而家佢只要噏句爛口，就等同姦佐對方個老母親，快活之餘，仲兼夾羞辱對方同對方個老竇，豈非能言禽獸嘅莫大快事耶！

有一次去買幾棵菜，唔知為佐乜野原因，送貨入檔嗰個爛口佬對收貨個婆娘講佐一句，好簡潔，又直接，「勞務」全免，淨係話要進入女方個陰戶！對方似乎一啲都冇尷尬，又唔嬲，仲催個爛口佬即刻除褲，話有同事做證，如果個死佬夠膽剝光豬，佢唔畀自己個陰戶過佢進入，就輸幾多都得噉話！講完仲哈哈大笑添。個爛口佬竟然冇聲出。至於佢地雙方嘅表情，我不得而知，因為冇眼睇。

我諗：莫非好佬怕爛佬，爛佬怕「浪」婦？

由此可見，似乎係會有啲噉嘅女性，欣然接受或者享受男性對佢地講爛口，就算清晰明瞭直指要進入佢地個私處，都唔反對，甚至無任歡迎。

不過，多數嘅時候，啲爛口佬未必可以講得噤過癮、噤肆無忌憚喇，癮大者死忍唔講，則心癢難撓好難頂，於是唯有遮遮掩掩，使用諧音字過骨法啦。

前幾年內地當局高壓行政之下，要「清洗」網絡，屏蔽所謂低俗內容，赤裸裸嘅爛口文字首當其衝。然而上有政策，下有對策，「草X馬」之類於是應運而生，歷久不衰。南美洲嘅羊駝就倒霉喇，竟然畀啲爛口佬「惡搞」，同佢改名，就係叫佐佢做「草X馬」！而家搞到網上周戍都係，好多人仲以為真有其「馬」添。爛口為禍不淺，殃及無辜，真係可悲！

其實爛口有其心理根源，就係出自男人嘅原始動物性，或謂獸性，即係原始人類嘅攻擊性同性攻擊兩種本能衝動嘅揉合。呢兩種本能係原始人類個體同族群賴以存活及繁衍嘅動力。言為心聲，有噉嘅本能衝動，就算一時做唔倒，都要噏吓當真。

今日人類雖然不復原始，但係本性難移，如果得唔倒教育嘅有效改造，所有男人幾乎都一定會講爛口；天生原始獸性含量越高嘅男人，越有講爛口嘅衝動同需要。有啲男人幾乎完全唔鍾意講野，成日唔出一粒聲；但係一出聲，就係爛口！

獸性成份極高者，就乜鬼野教育都起唔倒作用喇；就算身為牛橋耶佛博士後，一樣粗口爛舌，炒蝦拆蟹！呢類男人嗰舖爛口，幾乎等同毒癮，無法長時間抑制，否則就會失控爆發。

最後講講一個幾有趣嘅必然現象，就係女人如果要爛口，就只可以模仿男人嗰套，無法另起爐灶。如此一來，爛起上黎就冇乜優勢喇，就算佢話要向對方施加「艱巨勞務」，實際上又邊戍「艱巨」得倒嗟！所以識得些少英語嘅話，咪最多只可以噏吓嗰個 f-word 囉。唯此 f-word 最好駛，男女通用！