粵音輸入法

有啲時要用到粵音輸入法，因為畢竟身在「本土」，難免有時會打吓「廣東文」。

微軟視窗10好奇怪，一如未升級前嘅視窗，除咗內建嘅嗰幾種中文輸入法之外，並不「歡迎」其他各「法」；最令人莫名其妙嘅，係明明都已經喺「控制台」嘅「輸入法」裏便安裝咗嘅囉喎，喺MS Edge嘅界面裏便就係叫唔倒佢地出嚟，總之就係唔得，包括我最常用嘅「新酷音輸入法」，無從打入要搜尋嘅相關字眼！

最莫名其妙嘅，係「香港粵語輸入法」本來就係MS Office嘅內建漢字輸入程式之一，居然一樣畀佢「踢出界外」，冇法子喺Edge上便露面！

好彩我幾乎唔用Edge, 上網搜尋中文網頁只係用Google Chrome同埋Mozilla Firefox, 所以唔洗被迫用佢嗰啲內建嘅「倉頡」或者「微軟注音」。

講到哩個「香港粵語輸入法」，我甚少喺Office裏便使用，但係喺手機上便就幾乎可以話係一日冇佢都唔得，因為我非常之唔鍾意「倉頡」嘅「夾硬嚟拆字法」，要無理強制死記；更加唔肯「手寫」，因為唔可以單手揸機順便打字，隨時隨地從容發訊息。

Google嘅手機Cantonese Input App包括三種鍵入拼式系統，有「耶魯Yale」、「粵拼Jyutping」同埋「教院式Cantonese Pinyin」三種任隨選擇。

我選用「粵拼」鍵入方式，因為佢喺字母分配上嘅設計好過其他兩種，佢唔用ch, ts, dz 哩三組復合字母做聲母，並且「誰、遵、律」哩三個韻嘅主元音用eo表示，同「靴、想、腳」三韻用oe表示有所區分，對應發音嘅實際差異。

不過其實就算我打嘅係「廣東文」，通常都唔鍾意用「粵音輸入法」乜滯，因為始終都係唔多適應佢使用國際音標j, 譬如個粵字要打jyut, 有啲累贅。只係喺打唔出啲粵語特有字詞嘅時候，先至會切換過去。譬如話，個「嘅」字噉，我以習用嘅「酷音輸入法」鍵入「ㄎㄞˋ」，都一樣可以打得出嚟，因為哩個字喺粵語唔係自造專用，只係現存借用。但係諸如「啲」字呀、「嚟」字呀、「瞓」字呀之類，就冇晒辦法喇，如果唔切換輸入法，就只可以學似以前噉樣，乖乖哋用插入或者複製貼上嘅方法，唔止十分麻煩，仲冇厘樂趣添。

有咗哩種「本土字音輸入法」，需要打「本土話」嘅時候可以有得用，無疑方便好多。對我嚟講，確係冇法子想像手寫輸入、又或者複製貼上嘅滋味。

哩個輸入法仲可以自造詞庫，不過造得嚟真係蚊到瞓囉！未曾措得幾個自造詞之前，真係揀字揀到有啲發，十分之唔過癮！