「挖事噏」(WhatsApp)粵韻戲謔詩一首並序

我地大樓法團嗰位女司庫嘅職業雖非「人之患」，卻「好為人師」，偶爾仲會「師」得赧有詩意。不過佢唔識作嘢，又冇核准教材，只係擅長貼料轉發。前一排又唔知喺邊戍抄咗首小兒級勸世打油詩，貼上佢自己創建嘅群組度，自作好心，教大家最最正確嘅做人態度；仲不厭其詳請大家傳開去，叫人諗起邊個就傳畀邊個，等所有朋友都可以受益噉話添！

點知嗰位冇乜幽默感、噏親乜嘢我都總係睇唔多明嘅主席佢老人家竟然頂唔順，粒聲唔出，馬上退出群組！嗰位詩意司庫居然仲唔明白點解，覺得好可惜噉話，真係畀佢攞埋敝野客個膽！

之我就噉樣理解喎：人地假假哋話晒都係堂堂一位主席，仲一把年紀，洗乜鬼你公然喺群組度教佢做人啫，吓嘩？係都靜靜雞貼去佢個私人帳戶啦，係咪？真係睬你都生小兒積啦！你估佢係你老友，嗗聲忍咗你咩！唔即刻退出，唔通等你再接再厲，繼續抄埋晒啲意義深長嘅超筍補習天皇級講義，當佢係中學生嚟循循善誘？唔怕得罪講句，真係有些少天真爛漫喎！

我作為堂堂「團總書記」，哩趟都畀佢「教」到啼笑皆非，佢未開群組之前早有前科，鬧佢又唔好，笑佢又唔明，嬲佢又唔知，真係冇乜佢修！唯有老老實實順便作嘢玩吓，同佢首勸世詩嘅詩意背道而馳，噉樣敬答一番啦，嚡！：

就算百廿九，賴死唔肯走！
做人要貪心，越貪越係有！
口噏話運動，未做先要唞！
營養免均衡，食極都唔夠！
冇肉難歡悅，腹大眉宇秀。
餐餐上酒家，常客享折扣。
腦筋洗鬼郁，醒目靠神佑。
油鹽唔怕多，降醇有靚酒。
物色奇驗方，幾劑癌有救！
飲茶約豬朋，打牌搵狗友；
吹水用手機，話題興紅酒。
懶理天下事，碳排冇研究；
家住摩天厦，水浸有得守。
做人要快樂，快樂靠朋友；
識得朋友多，酒肉不離口！
今朝朋友日，司庫冇停手；
抄嘢送畀人，忙到有啲嘔！