鴨食鴨骨

近年本地有所謂「粵語正音運動」，發源於大學，多年嚟得到教育系統嘅支持，喺大、中、小學粵音中文教學、粵語電台及電視廣播等方面漸漸紮根，造成影響。

同時又有所謂「廣府話救亡運動」，組織者激烈反對「粵語正音運動」，認為該「運動」係要「謀殺廣府話」。

上便篇題「鴨食鴨骨」，意思絕對唔係譏笑對壘雙方喺度鴨食鴨骨，係就索性用句廣府俗語：「狗咬狗骨」。 所以要話鴨食鴨骨，其實係從我地奇妙嘅粵語音韻現象，偶然聯想出嚟嘅一句廢話而已。

第一個鴨字，唔係「劏雞殺鴨」嗰個「鴨」，「劏雞殺鴨」個「鴨」讀「中入聲」，而家呢個「鴨」字係口語變調，音值同陰上聲相若。由於其調性未為專家承認，無以名之，姑且擅自叫佢做「入陰上」。

廣州音系一如其他現代漢語方言，承繼自古漢語。不過，可能因為過去一二千年嚟地緣阻隔，佢偏處嶺南，語音發展歷程同北方話好唔同，保留咗比較多嘅古漢語特徵。 廣州音系唔只聲調多，而且三種鼻韻尾同對應嘅三種塞音韻尾齊全。 北京音系已經失去存在於古漢語嘅雙唇鼻輔音韻尾 -m, 同埋三個塞音韻尾 -p, -t, -k, 即係話：北京音系失去咗「入聲」。

雖然係噉，並唔係話廣州音系一二千年嚟一成不變，保留完整嘅古音系統。 世界上冇一種語音系統可以保持百年不變，何況千年！ 好似英語噉，明明係拼音文字，但係講英語嘅人就係唔理你點拼，話變就變。 譬如話：God bless this dog eat dog world, 明明係 gawd, dawg 嘛，但係有一類美國英語會講成 gahd, dahg. Dog 裏頭嘅開口圓唇低元音O, 已經變為展唇。 啲噤基本嘅表音符號，居然都可以夾硬改變！

不過即使係噉，現今啲英格蘭人就算心裏頭唔多順，甚至認為美國英語唔算係 Standard English, 但斷斷唔會話美國人讀錯音。

語音可以用權威強行規範，但係作用好有限；縱能規範於一時，不能規範於長遠；縱能規範少數乖乖考試精英，不能規範廣大曳曳人民群眾。

成個聯合王國嘅面積只有區區二十四萬平方公里，人口不過六千萬，自有 RP 以來，自有 BBC 以來，一直未有擺脫南腔北調嘅語言現實。 曾幾何時，語言專家以為可以用 RP 統一全國方言，後來明白無能為力。 雖然同係 English, 你有你講 Cockney, 佢有佢講 Scouse. 自從1970年代， BBC 甚至放棄再用 RP 標準考核廣播員。 今日嘅所謂 British Standard English, 喺好多英國語言學家心目中，已然並不要求任何一種指定口音，包括 RP, 亦即係話，口音 accent 同發音變異 pronunciation variant, 都唔應該係一種語言講得是否標準嘅衡量尺度。
但係我地個社會迷信考試，迷信發掘精英，迷信統一標準，迷信規範，連講野都唔例外。好啦，你夾硬規範，透過考試批佢一個U級，打上烙印，只會誘生反感，對於社會普遍語文水平嘅提升，非徒無益，而又害之。

人嘅語言面貌，一如容顏，總有美醜，一望而知，偏偏仲要喺佢個額頭上便刺青，標明等級，用意何在！？

世界上變體英語好多，譬如新加坡英語，如果引進RP標準，好多人唔知點樣開口講野！

世界上變體官話有兩種，譬如台灣國語，如果引進普通話標準，好多人唔知點樣開口講說話！

世界上變體廣州話有好幾種，譬如香港粵語，如果引進現今廣州標準，好多人唔知點樣開口發噏風！

好在中國國家語言文字工作委員會只製定普通話語音標準。廣州話被視為方言，似乎並冇加以「規範」，歷來未有官定標準。香港教育、考試當局似乎亦未從廣州地區引進權威語音專才。

如今有位居本地學術高地嘅專家，依據一部古韻書，即係《廣韻》，考核所有本地粵語字音，對認為錯誤而不能容忍者，予以重新訂正，編纂為字書，推行於教育及廣播系統。

反對者於是群起而攻之，號召為廣府話「救亡」。

我雖然並無譏笑對壘雙方「鴨食鴨骨」之意，但我講本地粵語從細講到大，從大講到老，如今竟然墜於五里霧中，不知何去何從。 一如唔知「鴨食鴨骨」嗰個變調之後，同陰上音值相等或者相若嘅第一個「鴨」字，應該如何處置；亦唔知亂讀會唔會顯示語文水平低落：

今人競勢，以才殺伐；勝者登台，敗者匿窟；豬噬豬頭，狗咬狗笏；牛食牛肉，鴨食鴨骨；惡言相詆，牙尖舌崛；難唔難睇？核唔核突？

本地教育系統嘅粵語音韻學專家要在全領域訂正粵音，所據韻書為宋朝陳彭年等人以《切韻》為依據，所「奉詔重修」嘅《(大宋重修)廣韻》。

喺呢度且不從精細處著眼，去質疑《廣韻》到底有冇條件作為訂正一種生謳謳嘅現行語音系統嘅標準，而係從大處隨便噏幾句。

我諗，如果《廣韻》足以作為現行本地粵方言字音嘅「宗祖」，佢冇乜野理由唔可以同時作為閩語、客語、贛語、湘語、吳語，甚至現行漢語標準語嘅共同宗祖，因為大概喺漢唐之世，就語音系統而言，南言北語當未至好似今日有噤大歧異。

如是者所有漢語方言各各返本還原，一一退歸古雅；能考則考，不能則擬；最終會喺漢唐，甚至周秦會合，至此各各大小方言必當相融為一，不亦美哉！ 然而，茲事體大呀！

另外，粵語恐怕是必廢除陰陽之別，恢復全濁聲紐，方得盡善。 淨係呢樣就好鬼死有挑戰性啦！諗諗都過癮！

不過我又諗番轉頭，大概音韻學專家同教育系統都唔係要做到噤「激退」嘅，佢地絕對冇諗過要「謀殺廣府話」，只不過係深愛母語，並且迷上《廣韻》，又有啲妄自尊大，一一都過咗頭啫。

至於敵對一方，似乎只在感情用事，並未搵到敵人死穴，往往虛發其矢，徒勞無功。

計我話呢，廣府話點搞都唔會死嘅。承傳咗兩千年，歷盡滄桑，屹立不倒，邊會死得噤易呀！