電郵致友人—隻雀揖佛

Old C.,

估唔到你個電腦系統噤鬼先進，都顯示唔出我地啲母語專用字！你塊手寫板噤鬼 hi-tech-ly smart, 都冇法子同尊手有效溝通！哈哈哈！ 真係！ 可見粵語神聖，粵音優越！

我嘅所謂「鴨食鴨骨」唔同你提出嘅異體詞組「鵝食鵝骨」。 鵝係平聲字，變調讀陰上，並冇衍生入聲(實際為入韻)問題。我嘅所謂「鴨食鴨骨」有所不同，「食鴨骨」三字包括全部三個塞音韻尾 -p, -t, -k, ngaapX seik9 ngaap8 gwat7；調性按音高順次為：入(韻)陰上，入(韻)陽去，入(韻)陰去，入(韻)陰平。 四字唔同調值。 傳統九聲並不包含第一個鴨字嘅口語變調。四字實際調值按「五度音高表示法」依次為35, 22, 33, 44(或55)，按一般六聲表示法嘅調序為：2, 6, 3, 1.
鴨字收塞音韻尾 -p, 不除阻，係傳統所謂入聲字，口語變調後衍生出個新調為傳統「九聲說」所無，即係我杜撰嘅所謂「入(韻)陰上」，無形中口語粵音無端端變佐有「十聲」，不符合傳統音韻學「粵語有九聲」嘅權威講法。 正惟如是，我好想拜請音韻學家下達處置指令，祈求澄清，當代本地現行粵方言嘅語音系統，究竟係有九聲呢，還是十聲？我點敢擅作主張！ 因為茲事體大。如果唔承認「十聲」，亦可以推翻「九聲」，因為上古雅言最多只可能有四聲！當代音韻學家一般都同意，四聲嘅陰陽，係中古時期由清濁對應演變而生。

在此再舉一例：「隻雀揖佛」。
呢句係跨時漢語，即係廣東話同古漢語兩溝。喺現代標準漢語就要話：這隻鳥向佛陀拱手為禮。
此鳥既懂揖佛，其所歸類，大概非「佛法僧目」莫屬嘞。 但係，直觀嘅睇法未必實啱。人間世，歷來就有不著僧袍嘅大慈悲者，亦有披上袈裟嘅壞人。 揖佛者未必遵行佛法，自命崇佛者行惡殺生，並不鮮見。 佛法僧目嘅釣魚郎正係一隻捕魚名雀(口語變調)。
唉，扯佐去邊？ 其實只係想講，呢句短語按傳統九聲表示法係 8 -k, 8(變10) -k, 7 -p, 9 -t. 按六聲表示法就係 3, 2, 1, 6.
噉你話點為是？

《南史》記載沈約「撰《四聲譜》，以為在昔詞人，累千載而不悟，而獨得胸衿，窮其妙旨，自謂入神之作，高祖雅不好焉。帝問周舍曰：何謂四聲？舍曰：天子聖哲是也。然帝竟不遵用。」

現知最早提出「四聲」同埋有關詩律理論者，就係呢位南朝文學家沈約。 當時梁武帝蕭衍「竟不遵用」，因為佢老人家「雅不好焉」。 所謂雅者，大抵有「正統、高尚」之意，在中國嘅傳統觀念之中，從來首要條件就係必先要夠古，然後能雅；越古就越雅，不古則不雅。時興或者新生、新發展嘅事物，就一定雅唔出個乜樣；既然「不雅」，當然就即係俗囉。 由此可以大膽推想，沈約提出嘅所謂「四聲」，肯定係梁武帝聞所未聞，而要拒絕接受嘅新發展事物。佢大概根本唔願意承認沈約提出嘅所謂「四聲」嘅語音規律，認為通俗時髦不入流，冇乜價值都未定。

因此，喺「粵音九聲」提法確立已久嘅今日，話入聲非聲，或者話粵音只有六聲，有啲傳統音韻學權威會不以為然。既然一定要話有九聲，一定要排序為123456789, 噉個入聲口語變調已經生謳謳變佐出黎，實實在在有件噉野，係都唔畀地方佢企，似乎唔係幾通喎！
無可如何，九九歸一，我不妨撐大佢，話夠十聲，噉就足以包括呢個口語變調嘞。雖然將佢排喺第十，不合原來七八九聲以音高定調序。但係確實不能插入七八之間而作七˙五喎，只好謂之十。前人疏漏，不得已也。

漢語嘅發展，一如所有人類語言，語音係原生現象，屬第一性；字音只係次生，屬第二性。 現今世界上仲有好多原始部落未有文字，但一定唔會冇語言。唔通有權威專家會唔承認呢啲語言嘅所有語音成分咩？
已然存在嘅粵方言口語變調，係出乎原生語言現象，屬第一性，再權威嘅學者都唔可以為佐回歸「正統」，而不予承認。

語言係好複雜嘅社會現象，語音永遠喺度不停變異，不以人嘅意志為轉移。 聯合王國女王陛下本人嘅 Queen's accent, 就同五十年前有分別。 造成語音改變嘅力量，並非來自某啲個人；唔理你係地位崇高嘅女王、學者、教授、博士、語言學家、或者語音規範權威，除非加諸嚴刑峻法，仿效秦始皇，否則權威作用不大。語音漸變於無形，如水滴石穿，動力係來自全社會，來自成個語音系統嘅所有每日使用者，來自佢地嘅發音器官同大腦；來自所有政治階級，同埋所有社會階層。

你提到今日香港年輕人嘅語音毛病，我睇原因有好幾個，有個人語言能力嘅問題，包括先天因素；有父母教育水平同語音面貌嘅問題；有幼稚園同小學教師語音面貌或者語言能力嘅問題；有同儕互相模仿以求群組認同嘅問題。總之好複雜，唔怪得晒佢地，要怪就首先要怪社會，或者怪教育人員，怪教育當局。
如果有個年輕人話：dur nem of dur onlye ghem yis dur sem as dur blye decylah Jems Ken (the name of the online game is the same as the blind designer James Caine)!
你去搵精通RP嘅 Doctah Ho 或者搵個 native speaker 黎幫佢正音，九成唔會有乜成效！ 呢個唔係認知嘅問題，多數係個人語言能力嘅問題，或者係由傳統缺乏反覆思考嘅學習過程所造成嘅缺陷學習模式所致。
Bad habits die hard, and bad rabbits bite card (pet owner's credit card), 一笑！

今日語音承傳嘅問題相當複雜，一如基因特質遺傳，我地個社會既然唔提倡公然宣揚優生學，既然唔鼓勵公開迷信物競天擇，不適者糞街，唔贊成明目張膽擇優遺傳，噉就要容忍會產生並保留較多有瑕疵嘅後代。 講野發音出問題嘅，只不過係其中一種而已。

而家教育系統班權威專家唔單只係要正音。正音本身唔係問題，好多其實唔多識音韻學嘅反對者都唔係話反對佢地正音，而係反對佢地要恢復古音呀！
你諗下，快捷，你一攷古韻，唔再讀得快節(現行本地粵方言箭字嘅中入聲，收-t), 要讀成漸嘅陽入聲，收-p, 葉韻)，否則扣分！你話點搞！ 如是者越攷越古，攷到古無陰陽，攷到古無上聲(黃季剛)，攷到古無去聲(段玉裁)，只有平入二聲，你話點算好？ 呢個捷字，都唔知駛唔駛進一步讀成濁音 dzeeb！

古音可以攷，即使攷到女媧補天之時所用天上方音都冇問題，但其目的不應在於奉古音為正統啊。況且古韻書不多，難保冇錯，錯則無以校勘。你當然可以建議用古音，用者有獎，但係不能強行定作規範，在社會尚未普遍自然採用之前，視為單一標準呀！

我地嘅教育系統同內容雖然抄自聯合王國，但係偏頗落後，人民普遍素質未及西方水平，唯有迷信教授，迷信專家，迷信學歷，迷信銜頭；加上社會功利主義嚴重，漢語音韻學嚇死晒一般中文系生！你諗下，大學中文系畢業，好多未識分辨平仄，仲搞乜鬼野音韻學嗟！於是山中 no tiger, bobcat 做 leader, 有時 bobcats 會走火入魔，自以為正統，自定於一尊，居於高位，自把自為，無視異見者，噉就會催生社會問題，甚至搞到滿城風雨，幫社會和諧挖牆腳。噉，就牙煙喇！