烏犬東東嘅不幸

古村村長喺村外另有居所，但係天氣好嘅話，通常會番入村，利用自己祖屋同涼棚，為週末、假日嘅行山客，提供餐飲服務。

村長收養咗一個烏犬，叫做東東，委以保安同埋保鑣雙重責任。東東入村時只係狗仔，但係大得零舍快，冇做絕育手術，未夠一歲就識得去搵雌犬成其好事。村長話佢去得好遠，早出晚歸，週時唔黐家，甚至有時索性兩三日都唔番嚟。

東東雖然烏卒卒，唔講得話靚仔，但係矯健強壯，從來唔怕牛蜱；並且驍勇善戰，週不時同啲白撞嘅野豬呀、馬騮呀噉、連番惡鬥，曾因此數度負傷。

我估東東唔承認野豬、箭豬、馬騮、浪牛踩入古村，乃係天經地義，所以反應噤鬼躁動。

根本人地九成係本土原生猴、原生豚、原生牛，自古以來就喺哩度自由出沒，反而佢烏犬自己、先至係來歷不明嘅「老外」。佢話就話係叫做「唐狗」，但查實同漢、唐，甚至宋、元、明、清都冇乜關係，至今未能檢測究竟有冇、有幾多原生土狗嘅基因，反而可以假定，實拯係數唔清噤多種「番狗」嘅深度混種，因不列顛殖民帝國嘅因素、包括當時「住洋樓養番狗」嘅高尚風氣盛行、而得以產生、存在、繁衍；若果冇不列顛帝國殖民統治，就唔會有佢，所以英語唔叫佢做 Tong Kow, nor Chinese dog, 而係謂之 mongrel, 意為混種，發音同馬騮嘅 monkey 只係一音之別。

烏犬東東對彼此嘅宗族源流、同埋本土嘅帝國歷史、當然都一無所知，大概仲自以為本土係佢專有，與馬騮、野豬勢不兩立，每每拼死驅猴、逐豚、趕牛；可能睇過吓電視，見人地「本土獨青」「驅蝗」驅得超勁過癮，乃至極度亢奮，所以有樣學樣啩！

敝客覺得噉樣十分唔妥，都好言相勸過佢；我話東東，人地馬騮、野豬呀噉，同你主人一樣，遠喺割地、租借之前，祖祖輩輩就喺本土生活咗好耐；你嘅祖宗呢，反而係後來先至由唔知邊度遷徙入嚟嘅。家吓人地經過村邊，摘些少野果食啫，又唔係入嚟偷你啲嘢，你唔洗對人地噤惡死嘅，吓嘩？牛就話都幾馴，任驅唔嬲啫；啲馬騮、野豬唔係牛噉品咖馬！無謂噤勇喇！

東東趴喺嗰度，既冇回應，亦無反應，應該就係聽唔明，同埋索性當我發噏風！此後驅猴、驅豚如舊，彼此交惡嘅程度自然與日俱增。

前排有一獼幫喺村邊過路，東東又去挑戰，當然又係勇武強悍，以一敵眾；佢追趕人地追到上山，狷入叢林，不惜深陷敵陣。嚡！結果哩趟映真唔好彩，遭遇歷來最兇猛嘅反擊，結果身負重傷番落嚟，一隻腳趷吓趷吓，唔行得乜滯，趴低嘅動作要就住就住，好慢好慢，情狀顯示非常痛苦！並且傷情急劇惡化，顯示已經罹受細菌感染。

須知馬騮啲爛牙同埋口水都唔係嘢少，含附好多惡毒病菌；畀佢咬一兩啖嘅話，我諗東東仲可以當作閒事，但係而家咬到遍體鱗傷，並且有幾處好深嘅傷口。當然東東哩鋪都未必輸得晒，或者會有馬騮畀佢咬死都未定，但係即管各有輸贏，畢竟兩敗俱傷。哩個烏犬真係冇乜必要、同埋唔值得噤勇武。

村長見東東病情沉重，想話帶佢出去市區睇醫生，但係佢就死都唔肯套上狗帶，反而鬼死噤惡，作勢要咬人添！村長唯有喂佢服食抗生素，但係一直唔見好轉。捱咗成個月，傷勢反而越趨嚴重，創口爆裂，流出血膿，終至全身感染，病入膏肓，奄奄一息。村長話係「血毒症」。

週末行山經過嘅愛護動物人士見倒，甚為不忍，向村長要求安排將佢送去市區就醫。

哩勻東東又唔反抗喎，仲乖乖哋自己行入個鐵籠，任由啲義工抬上大飛運走添。

可惜已經為時太晚，終於都係吉犬唔得天相，藥石罔效，一週之後，東東喺寵物醫院不治，與本土長辭，享年三歲！

東東確係一個盡忠守護本土嘅優秀唐狗。噉樣勇武犧牲，能不令人惋惜！